中環出更：林青扮學生妹神似全靠眼鏡冷背心
倒數迎接元旦新年梗要熱熱鬧鬧、開開心心，唔少名人早排都費盡心思搞派對迎新年。香港福建三明聯會青委會副主任林青（Erica）同埋老公唐卓敏就去咗老友屋企玩「聯校新年派對」，齊齊時光倒流扮學生。Erica嘅學生妹打扮維妙維肖，不過原來呢啲架生都係臨急喺衣櫃摷出嚟嘅。佢笑笑口話，扮學生嘅神髓係黑框眼鏡同埋日系風格冷背心，所以佢特登搵咗件打高爾夫球時着嘅背心頂檔，即刻加咗幾分神似。
Erica話，往年多數參加跨年大派對，今年想同三五知己溫馨咁過，但又唔想太平淡，所以就突發奇想搞個學生派對。當日除咗校章係買返嚟之外，其他衣物都同真實嘅制服無關，睇唔出佢都幾有扮嘢天分喎。
劉黃寧達去酒店搞家庭派對
大玩扮嘢派對迎新年嘅仲有珠寶設計師劉黃寧達（Leta）同妹妹林黃寧艷（Lianne）等家人。佢哋三姊妹每年都返新加坡同媽媽一齊倒數，今次十幾名家人齊齊參加喺酒店內舉行嘅九十年代熱舞主題派對。見Leta嘅老公劉守良綁住花頭巾揸電單車，同佢平時官仔骨骨嘅律師裝扮好唔同，都幾搞笑。Lianne就話，早幾日坐郵輪時凍親，身體不適，但見小朋友玩得盡興，自己都好開心。
香港表廠商會會董周宛賢（Amy）都過咗一個難忘嘅跨年派對，事關佢搞咗場電車遊同老公Chris慶祝結婚二十周年兼且同親友迎新年。Amy笑稱，當年佢同老公結婚時話過好想喺叮叮上搞生日會，不過一直冇實現，今次索性坐叮叮慶祝結婚周年。為咗製造驚喜，Amy特別剪晒指甲偷偷哋學結他，當晚表演自彈自唱，老公都感動到眼濕濕。
卓妮