政情：峯鴿派膠畀位建制派反港獨
內地異見作家馬建早前喺中環大館舉行講座，雖一度鬧出「被取消」風波，但最終都如期喺大館舉行。但身兼當區區議員嘅民主黨立法會議員許智峯（峯鴿）依然玩嘢，喺尋日中西區區議會會議上提出動議，要求發展局責成負責大館營運嘅馬會，確保大館日後運作保障言論及創作自由。有建制派議員就提出修訂，令議案變成反港獨議案。峯鴿今次真係唔衰攞嚟衰喇！
玩嘢促確保大館言論自由
馬建舊年十一月喺大館舉行嘅香港國際文學節講座一度鬧出「被取消」風波。事隔約兩個月，峯鴿就喺尋日區議會會議提出議案，指對於馬會一度取消馬建嘅演講場地，做法涉政治審查同限制言論自由，對此表示遺憾，要求發展局責成馬會，確保大館日後的運作開放透明，保障言論以及創作自由。
當區民建聯區議員楊開永就峯鴿議案提出修訂，喺原議案增加「要防止大館設施被濫用作宣揚港獨的活動」字句，變相打擊港獨。而有關修訂更喺建制派支持下獲通過。