政情：盈餘大跌 何君堯仲叫派錢？
新一份財政預算案喺下月公布，但財政司司長陳茂波（波叔）早前已放晒風話財政盈餘大幅下跌，似乎係暗示唔會派錢，但立法會議員何君堯前日見波叔時依然建議要「派錢回饋」，唔通佢睇到近日有民調指有兩成半受訪市民話唔夠錢使，所以特登叫財爺開倉派米？
措施針對人口老化
何君堯喺Facebook貼咗佢畀政府嘅意見書，講明建議政府「派錢回饋」，但細讀內文嘅話，會發現佢並唔係講緊全民派錢，而係改善長者生活，例如提高長者生活津貼金額、取消有關資產審查、放寬現行津貼資產上限等，每一項都係針對人口老化嘅措施，有「掛羊頭賣狗肉」之嫌喎。
查實喺舊年二月公布預算案後，波叔補鑊透過關愛基金派四千蚊，到依家都未落到市民袋，而且條件多多，最尾派成點都仲係未知數，所以就算真係「派錢」，可能都係搞到「一鑊粥」。
何君堯唔止剩係建議「派錢」，仲建議「用錢投資」、「容許用錢」，例如活化強積金，畀所有強積金供款人可以選擇用自己嘅供款買醫療保險，或者喺一定年齡後可以用嚟支付買樓首期等，幫忙減輕輪候醫院、公屋嘅壓力咁話。