中環出更：立會咪兜前合照 田北辰孖區議員違規
立法會嘅規矩有好多，一唔小心就好易違規。立法會議員田北辰由二○一二年起當選，但亦都中招，佢尋日下晝同實政圓桌多名區議員見完財政司司長陳茂波，表達對財政預算案的意見後見記者，喺立法會二樓咪兜前合照，違反立法會嘅有關規定。
只供特定人士使用
立法會大樓採訪位置只供立法會議員、政府官員同獲邀出席委員會會議嘅團體代表及公眾人士使用，其他人士不得使用採訪位置作任何用途，包括同議員合照或陪同議員舉行新聞簡報會或接受訪問，可見田北辰同多名區議員雖然只有合照，但已違反有關規定。
田北辰回覆我哋嘅查詢時話，冇留意到有關規定，下次唔會再咁做嘞！
提到預算案嘅建議，佢講起自己總唔會要求派錢，建議應該要大幅增加子女免稅額至二十萬元，以減輕市民喺生育子女上嘅負擔，又要求改善幼兒照顧服務，包括調高社區保母時薪同最低工資水平相若。
卓妮