政情：潘佩璆補皮包 除夕補到元旦
除夕夜有人會鍾意到街外狂歡倒數，亦有人鍾意喺屋企享受寧靜一刻，前立法會議員潘佩璆應該就屬於後者喇，原來喺啱啱過去嘅除夕夜，潘佩璆留咗喺屋企縫補皮腰包，仲由除夕夜晚補到元旦朝早，補足六個鐘。究竟呢個皮腰包有咩特別，會令佢花咁多時間去縫補呢？
潘佩璆喺社交網站發貼，話佢呢個皮腰包尺寸啱啱可以放到手機、散紙同藍牙耳機，平時用嘅時間就穿喺皮帶上，唔使將啲嘢袋晒喺褲袋，搞到好臃腫咁，而腰包嘅深棕色牛皮仲低調而美觀添，之不過因為皮腰包用得耐，內部間隔嘅薄絹襯托就穿咗窿，所以佢就想將其修補。
拖咗四個月 先動工縫補
潘又話，原本想將皮腰包拎去畀改衫嘅大姐修補，點知對方拒絕，所以就搵咗啲布料，打算自己嚟，但都拖咗四個月，直到除夕夜先的起心肝動工。雖然佢都唔明白點解會忽然決定去補呢個皮包，完成咗都覺得好滿足咁話。話時話，潘都已經年過六旬，仲縫縫補補咁多個鐘，都算幾好眼力。