中環出更：林曉盈茹素 煲仔飯落黑松露
現代人愈嚟愈注重健康，愈來愈多人都係素食者，有「手套女王」之稱嘅林曉盈（Juliana）早前出席香港中小型企業聯合會第十一屆會董就職典禮時，講起自己依家有六成以上時間都食素，仲識整素食，笑言「唔係好叻，不過好多人會叫我再整囉」，最拿手係雜菇黑松露煲仔飯，食到大家添飯，真係聽落都想食呀！
好多人話食素好易肚餓，Juliana就話絕對唔係，如果只食生菜、白飯加豉油，就梗係容易餓，但真正食素，營養都要均衡，要有蛋白質同纖維等，佢煮嘢食仲已經多年冇用油，會用水蒸等方法。
身兼港安醫院慈善基金健康生活基金主席嘅Juliana，其後講起港安係全素食醫院，入面嘅素鮑魚粥，啲病人出院後，都特登話想返醫院嘅飯堂再食過。
孫大豪：眼乾唔敢做矯視
同場嘅香港鐘表業總會主席孫大豪，提及自己有八百至九百度近視，笑指「睇電視睇出嚟」，其後先透露其實係同遺傳有關，自小學二年級起戴眼鏡，初初出現硬嘅隱形眼鏡（con），爸爸都叫佢試吓戴，但考升中試前，唔知隻con崩咗，搞到第二朝隻眼腫晒，睇完醫生才趕回校夾硬考試，後來出現軟嘅con，佢隻眼又比較乾，最初出激光矯視時，佢原本都預約咗，但後來睇周刊話會有後遺症，就唔敢去做手術，直至依家就覺得無需要再做嘞。
仁濟前主席嚴徐玉珊及女兒嚴紀雯（Carmen）都有結伴出席活動，Carmen大爆媽媽每日朝早出街前都會跑半小時步，嚴太則話每日會做三十下sit-up，生完小朋友已經開始呢個習慣，及至近年覺得唔夠氣，佢就喺跑步機跑步，覺得做運動減壓又開心，食嘢就冇戒口，尤其係鍾意甜品咁話。
卓妮