元旦第一B湊成五代同堂
踏入二○一九年，兩男三女「元旦BB」搶閘出世！今年「第一B」於昨日零時十七分在港島東區醫院出世，體重二點八四公斤，是一名女嬰，新手爸爸戴先生表示，B女的來臨令家庭頓成「五代同堂」，戴生的太嫲已一百零三歲，家庭成員對再添新成員很開心：「因為個個都『升咗職』」。
現時廿八歲、從事建築業的戴先生及廿九歲任職牙醫助護的戴太太相戀十一載，結婚兩年後迎來首個愛情結晶品。新手爸爸戴先生表示，B女取名Hailey，寓意充滿希望，太太預產期原是一月十三日，但前日凌晨已開始陣痛，入院待產後，本以為會誕下除夕BB，豈料女嬰「拖吓拖吓」，意外衝閘成為首名「元旦BB」。
「多謝個天送咁好嘅禮物」
戴先生感謝太太為她誕下女兒，「多謝個天送咗咁好嘅禮物過新一年」，談到育兒之道及期望，戴先生指B女開心成長最緊要，「唔會要佢學呢樣、嗰樣」，直言不會為B女安排太多課外活動及補習班，最希望B女做個好人，「唔好學壞」，亦會支持女兒於成長路上尋找以及發展自己的興趣。
戴太太重提懷孕至順利誕下女兒時，不禁感觸落淚，她指B女很乖，「佗B」時較少出現嘔吐等問題，又稱懷孕時保持樂觀及正面心境最重要。
另有4名嬰兒搶閘出世
另外四名元旦BB，則有零時三十二分在屯門醫院出生的女嬰，體重一點四八公斤；零時三十五分，再有一名女嬰在瑪嘉烈醫院誕生，體重三點六六公斤，三名女嬰俱順產。零時四十三分，廣華醫院則有一名元旦男嬰出生，體重三點四六公斤，需剖腹生產。另外，零時三十六分，九龍城聖德肋撒醫院有一名男嬰出世，順產，體重三點七五公斤，母親是港人，首胎喜得麟兒。