政情:狗選美大開眼界 楊靜:寵物幸福過人

做珠寶生意嘅中華出入口商會副秘書長楊靜(Sally)同老公朱容基都係愛狗之人,屋企養咗兩隻可愛狗仔,仲因此啟發佢哋自創一個以寵物為主題嘅本地珠寶品牌。Sally笑笑口話,早前佢哋舉辦一場名為「香豬先生/小姐」嘅狗選美活動,因此結識一班城中超有愛心嘅寵物達人,對佢哋寵愛狗仔嘅程度大開眼界。

帶成篋衫幫狗仔換

Sally話,當時共有二百幾隻狗仔報名參賽,面試時會問狗主最難忘嘅事。一問就不得了,個個狗主講起都喊到眼淚直流,後來幫候選「佳麗」影相時,有狗主竟然帶成個篋咁大嘅狗仔衫嚟換,Sally形容好誇張,直嘆寵物真係幸福過人類。話時話,明明係狗選美,點解叫香豬呢?Sally話因為直接叫狗唔好聽,大家平時叫寵愛嘅人做咩豬、咩豬,所以索性叫香豬。

朱容基就話,最近呢班愛心狗主打算包機帶埋狗狗去日本玩,每人盛惠十幾萬元,佢哋原本都想去,但係Sally啱啱做完小手術,所以今次就唔跟喇!

第一手消息請下載on.cc東網iPhone/iPad/Android/Windows Phone Apps