中環出更：元旦遊行前夕 政總東翼前地固定花槽完工
民間人權陣線（民陣）將於今日舉辦元旦遊行，炮轟律政司決定唔會就前特首梁振英任內涉收取澳洲企業UGL五千萬港元事件進行檢控，以及「明日大嶼」填海計劃等事件，遊行終點係政府總部東翼前地。遊行前夕，政總東翼前地嘅固定花槽已經完工，唔通係怕元旦遊行會再有人佔領嗰個位置？
地面仍有泥沙樹葉
尋日下午，政總東翼前地固定花槽工程已經拆去原有圍上嘅白板，地面仍有泥沙及少許掉落嘅樹葉，有關人員運走數十盆多出嘅盆栽，又整理花槽附近嘅地磚，以及清洗花槽一帶位置，好似為工程埋緊尾。
政府總部東翼前地過去曾發生過佔領事件，其後加建永久圍欄，喺違法佔領行動後更一度關閉。去年六月，政總東翼前地內嘅旗杆平台擺滿盆栽，其時已經被外界質疑係為咗慎防再有遊行人士闖入佔領該處。十月該處更圍上白板，行政署當時聲稱有關工程會以固定花槽代替花盆，增加土壤等，目的係為咗令綠化效果更佳咁話喎。
卓妮