中環出更：李聖潑自細就做一家之「煮」
九龍樂善堂早前舉辦周年晚宴，主題係「樂善社屋•家添幸福」，究竟點先可以加添幸福呢？樂善堂主席李聖潑記番細個嗰陣，父母為生活中港兩地走，雖然有嫲嫲照顧，但作為大哥嘅佢都要擔起照顧細佬妹嘅責任，放咗學返去會親自煮飯畀細佬妹同嫲嫲食。咁細個就做一家之「煮」，聽落似乎好辛苦喎！
不過李聖潑就話一啲都唔會，因為自己鍾意食嘢，就跟嫲嫲學煮餸，炒菜、炒肉片難唔到佢，細佬妹都讚好食添！佢話無論家庭環境如何，能夠做到家人之間互相體諒，就已經夠晒幸福啦！
陳達華扮買嘢 其實去踢波
佢嘅弟弟、已經有四名仔女嘅常務總理李聖根就話，無論工作點忙都好，每星期一定會同太太抽空陪小朋友玩，一齊游吓水、打吓網球，或者去公園玩吓，認為陪住小朋友成長比物質生活更加重要。
第二副主席陳李玉佩（Kawina）都認同，小朋友最幸福嘅事就係無拘無束去玩。佢細個嗰陣父母管教好嚴，十八歲前都未試過出夜街。而Kawina老公、常務總理陳達華就話，細個落街玩要諗計仔，例如去踢波就話去買嘢，試過一去就兩、三個鐘，搞到阿爸落街搵仔，佢離遠見到阿爸走都走唔切添！
第一副主席楊小玲就話其實屋企唔使大，夠住就得，細個嗰陣屋企唔富裕，五兄弟姊妹一齊跳繩、自己整毽踢、養吓螞蟻，開開心心已經好幸福，寄語現今父母切忌太過物質化，尤其係「電子奶嘴」，真係可免則免。
卓妮