政情：反東北案完結 何潔泓岑敖暉九州放閃
聖誕節係外遊嘅旺季，兩名學聯前副秘書長何潔泓（Willis）、岑敖暉（Lester）就去咗日本九州拍拖，仲連日喺Facebook放閃。不過，咁又難怪嘅，事關Willis之前因為反東北案，護照一直被扣留，出唔到境，結果案件纏繞咗幾年，終於喺今年九月上訴得直，當庭釋放，到最近終於有機會去旅行喇，所以咪顯得特別珍貴囉！
避開煩囂去睇海
兩人去到九州似乎冇乜吃喝玩樂，反而鍾意去啲人煙疏落嘅地方，唔知係咪因為之前一直官司纏身，所以有意避開煩囂，去過一個平靜嘅聖誕節。兩人仲特別去到日本睇海，原來佢哋幾年前喺台東太麻里海岸線第一次一齊睇海，唔怪得對睇海咁情有獨鍾啦！
睇Facebook講到咁感動，差啲誤以為兩人係久別重逢，查實Willis因反東北案一度曾被判囚，期間Lester被指濫用立法會議員助理嘅身份，以「公務探訪」之名去探女朋友，所以兩人其實都冇真係分開過，只係之前冇得一齊去旅行啫。