政情：港大學生會批校委會任命閉門造車

擬辦公投 要求諮詢

為咗表示不滿，根據學生會刊物《學苑》報道，學生會將會喺出年一月二十八日至二月一日期間舉行公投議案，要求「香港大學校務委員會主席之任命組織應包括至少一個學生席位，並應在任命過程中諮詢學生。」

公投議案安排喺二○一九年度港大學生會周年大選，而根據憲章，公投議案要達致三個條件先可以通過，包括取得至少基本會員總數百分之十支持票，即約一千六百票、支持票多過反對票，同埋支持票同反對票總數多過棄權票。

學生會會長黃程鋒話發起公投係基於學生會對校委會主席嘅任命程序非常失望同不滿，直言顧問委員會形同虛設，無意聆聽學生意見。佢仲話公投議案若通過，係極具重要性同認受性，咁就可以藉此同校方表達學生聲音。

黃程鋒又提及學生會曾經喺二○一五年通過一項同校委會主席相關嘅公投議案，要求「香港大學校務委員會主席必須由教師、職員及學生接受的人選出任」，但校方無視公投結果，繼續委任李國章連任，黃覺得好遺憾，所以今次公投將重申學生會非常重視校委會主席嘅任命。