中環出更：法國黃背心示威 何啟明太太去埋一份
為市民爭取權益係立法會議員其中一項職責，勞工界立法會議員何啟明經常為基層勞工發聲，不過原來佢太太都唔弱。何太依家喺法國巴黎攻讀哲學博士，今年係第二年，而何太最近就參與咗當地嘅「黃背心示威」，唔通何太都想行維權路？何啟明解釋，雖然當地「黃背心示威」本身係反對加徵燃油稅，但鑑於法國總統馬克龍上場後，修改咗留學生攻讀博士可以喺大多數情況下豁免學費嘅政策，所以何太下學年開始要每年交四萬港元學費，於是何太就上街示威喇。
改政策變要交學費
何啟明話，當地政策改咗之後亞洲留學生要交學費，但非洲留學生就多數都有獎學金，相當唔公平。而因為示威令當地學校全部封晒，所以何太都已經幾個星期冇返學，連考試都取消埋。何啟明直言都擔心唔知會唔會影響太太畢業，至於未來要交多幾多學費，佢就話暫時預計需交八萬至十二萬港元。
臨近聖誕同新年，何太雖然冇得返學，但都冇提早返港，但就唔係顧住示威，而係因為聖誕節當日返港，來回機票比提早幾日返港平兩、三千元，所以為咗慳錢，就要遲啲先返港團聚喇。
卓妮