特衰政府冇嘢多，廢柴最多，淨係睇次次民意調查，班官嘅民望係咁尋底就知冇花冇假，而數到當中最廢嘅就梗係律政司司長鄭若驊啦，喺佢嘅領導之下，律政司淪為亂政司、庇奸司，有乜辦法唔民望低到阿媽都唔認得吖。
根據尋日出爐嘅一份最新民調，特衰政府一眾司局長評分繼續低迷，鄭若驊評分又一次喺三位司長中最低，蟬聯「墊司底」嘅諢名。市民眼睛雪亮，鄭若驊上任咁耐，唔係大宅僭建爆醜聞，就係為漢奸黎撐起一把從頭笠到腳嘅全方位保護傘，堂堂律政司唔係捍衞法治，而係帶頭自毀長城，阿姐佢嘅民望想唔低殘都難。
就講漢奸黎舊年六四粗口辱罵兼恐嚇《東方日報》記者單畸士吖，律政司拖足十八個月，都遲遲唔肯將漢奸黎落鑊。最惡頂係，對於東方及受害記者十一次致信追問辦案進展，律政司唔係唔理唔睬，就係虛詞廢話帶人遊花園，點止違反自訂嘅《罪行受害者約章》，更加係侮辱香港人嘅智慧。
講真，呢件案證據確鑿，案情簡單，律政司一係告一係唔告，唔該畀個明確交代。律政司有膽庇奸護淫到底嘅，咪大大方方告訴公眾，漢奸黎有免死金牌，等大家唔使再指望司法公正，使乜一拖再拖、死拖爛拖呀。
係人都知，鄭若驊係林鄭班子中最後選定嘅高官，但千揀萬揀揀着個爛燈盞，鄭若驊上任首日就爆出大宅僭建醜聞，當初有人話當局用人失察，家陣睇嚟係一個天大嘅誤會。林鄭要搞「大和解」，必須有個得力嘅人選嚟落實，恰恰鄭若驊「身有屎」，其身不正，係最佳人選，換咗個乾淨正派之人，點可能昧着良心曲法枉法，帶頭踐踏法治吖。
大家有眼見，律政司庇奸護淫永遠有藉口，放生政治黑金案就係「證據不足」，放生佔中案則係「證據太多」。反觀老百姓就冇呢啲優惠囉，阿婆以一蚊出售紙皮，要拉要鎖；補鞋匠日曬雨淋，要拉要鎖；收費員從地上執起一蚊放入口袋，又係要拉要鎖。法律面前係咪反對派更平等，律政司係咪怕咗漢奸有牙，仲使問嘅咩。
律政司一再以實際行動話畀大家聽，做漢奸洋走狗反對派，就有律政司保你免受刑責，一係拖十世都唔使上庭，一係判咗監都可以上訴得直，英雄般凱旋而歸，咁多年嚟香港亂象不斷，年輕人紛紛走上街頭甚至成為港獨生力軍，就係咁解。
「反中亂港招財進福，愛國愛港一仆一碌」，呢個就係香港現實嘅寫照，相信好多人同功夫茶一樣質疑，咁樣嘅回歸，究竟有乜意義！