政情：吳永嘉告別自由身 加入政黨
代表香港中華廠商聯合會嘅工業界（第二）立法會議員吳永嘉（Jimmy），自一六年立法會換屆加入立法會以來，一直係「自由身」，冇加入政黨，不過尋日佢就結束「自由身」生涯，加入政黨，從此「被困」喇！
掛雙牌頭「冇乜大問題」
Jimmy尋晚現身香港經濟民生聯盟六周年晚宴，身上仲佩戴住該黨嘅領呔，問到佢係咪已經加入咗黨，佢就笑笑口不置可否。直到晚宴開始，該黨正式宣布佢入黨，該黨高層為佢扣上黨徽襟章，佢先至話好開心喺度分享入黨嘅喜悅，又話廠商會同該黨一直有合作，佢都學到好多嘢，大家會繼續合作咁話。
Jimmy喺一六年進身立法會時曾講過會維持獨立身份，有指廠商會亦唔希望佢加入政黨或組織，以免喺立法會投票時因廠商會及所屬政團立場唔同而引起尷尬，但係佢尋日卻突破界限。被問到掛住「雙牌頭」，日後喺立法會投票時會如何抉擇，佢就笑稱，該黨其他立法會議員，例如立法會主席梁君彥、議員林健鋒亦代表唔同商會，似乎佢認為冇乜大問題喇。