政情：收印樣朱古力 黃之鋒要「食自己」
香港眾志秘書長黃之鋒尋日喺Facebook話要「食自己」，究竟係乜嘢事呢？原來佢收到一份令佢頭痛嘅禮物，只見份禮物一式多份，印咗佢個樣上去，驟眼睇有啲似電話套，但佢話其實係朱古力嚟！佢似乎就唔係好想食自己個樣落肚，惟有上網徵集意見，睇吓點處理堆朱古力，有網民就叫佢「係時候『食自己』」。
有人建議年宵義賣
事緣係早排黃之鋒獲頒蘭托斯人權獎（Lantos Human Rights Prize），原本應該要去美國領獎，但佢官司纏身，護照被扣留離唔到境，最後叫咗黨友去代領，不過佢就勢估唔到人哋會送番啲「甜頭」畀佢，就係印咗佢個樣嘅幾十件朱古力，搞到佢都好疑惑，反問：「係咪美國文化來的？」
網民就建議佢派畀支持者，或者拎去年宵義賣，比較有創意嘅就叫佢「係時候『食自己』」、「睇吓你想派畀邊個人『食』」、「食自己試吓係咩味先啦！」唔知佢睇完之後，會唔會真係試吓「食自己」呢？