政情：蔣麗芸何君堯選區民望包尾 換屆面臨危機

香港研究協會喺上月十九日至本月六日訪問逾千名十八歲或以上的市民，以一分最低、五分最高去評價立法會議員及政團表現，由於調查期間先進行九西補選，所以補選勝出嘅陳凱欣未有納入今次評分範圍，呢次調查只有五名九西議員嘅成績睇喇！

建制人滿為患 蔣恐被勸退

而隨住上月立法會九龍西補選結果出爐，建制派已經佔咗九西六席中嘅四席，建制派到二○二○年換屆選舉勢會人滿之患，所以外界早就傳出兩屆議員、四人中年紀最大嘅蔣麗芸最大機會被勸退。

睇番今次出爐嘅調查中，蔣麗芸評分只得二點三二分，為九西中最低分嘅一位議員，與最高分嘅議員黃碧雲相差○點一九分。再睇番三個建制派議員，梁美芬以二點四五分成最高分嘅一位，而三月先進入議會、蔣麗芸嘅黨友鄭泳舜都有二點四四分，足足比蔣麗芸高出○點一二分，呢兩位建制派議員喺分數上的確領先蔣麗芸唔少。不過都要肯定番蔣麗芸已經收窄咗差距，今次評分已經升咗○點一一分，但仍然冇改佢包尾嘅現實，連續四次喺九西包尾囉，如果蔣麗芸未來維持咁嘅表現，相信要說服到人畀佢繼續參選難度都唔細。

朱凱廸倘DQ 何難漁人得利

至於何君堯今屆取得三萬五千多票，以五千幾票之差壓過泛民對手，贏取到新界西嘅末席進入議會。而「票王」議員朱凱廸當時豪取八萬四千多票就被指吸票過多，令到非建制派喺新界西有五成半嘅得票率，都只能夠喺九席中拎得四席，更令多名資深泛民議員未能成功連任。

不過，朱凱廸早前參加元朗八鄉元崗新村居民代表選舉，就被取消參選資格，外界相信佢要入閘爭取連任立法會都有危機，所以何君堯下屆未必可以再靠漁人得利方式進入立法會。睇番最新民調，何君堯喺新西九人中以二點一分排最尾，較上次調查大跌○點一九分，而今次與同居尾二嘅議員陳恒鑌、梁志祥都相差成○點九分，睇嚟何君堯危機都唔細囉！