中環出更：籲勿往北角車禍現場 郭偉强同網民駁火
北角前日發生致命交通意外，相當驚人，工聯會嘅立法會議員郭偉强親身去到東區醫院了解情況，仲喺Facebook呼籲市民唔好前往北角現場，以免更加混亂，但就有網民批評佢嘅做法，話佢去到醫院都幫唔到手，只係搞住啲急救人員，認為現場消息睇新聞都足夠，點知郭劈頭嘅回覆就係：「呢個世界多你一個已很多餘。」引起雙方罵戰。
網民形容郭係「泛民本色」，即係「有事唔好搞我，無事去攞個彩」，暗指郭嘅做法係政治抽水，但郭隨後反擊，嘲諷「要學反對派匿埋才是幫到手」、「難怪反對派永遠是對的！」
郭接受查詢時解釋，其實過往做法都係咁，每次發生工業、交通等意外時，一係去案發現場，一係去醫院，雖然佢唔係醫生，但係可以關心吓啲死傷者家屬，同埋提點佢啲流程、點樣跟進等，佢又形容網民係「鍵盤戰士」，認為嗰啲網民對社區冇感情，所以先講得出咁嘅說話。
張國鈞懶理遭「洗版」
至於去咗北角案發現場嘅民建聯立法會議員張國鈞都難逃網民批評，喺Facebook畀網民「洗版」，寸佢「影相打卡係咪好開心？」、「你醫生定救護員？到現場有咩幫助？」、「多謝垃圾議員來抽水。」不過，張就冇回覆連番嘅批評，懶得理班網民。
卓妮