中環出更：余漢坤搵長老畫族譜方便尋根
香港浙江省同鄉會聯合會（浙聯會）早前舉行慶祝成立廿周年晚會，包括會長詹耀良、大會主席兼第一常務副會長陳仲尼、「世界毛紡大王」曹光彪兒子曹其鏞等浙江人濟濟一堂。離島區議會副主席余漢坤（Randy）都有到場，佢笑笑口自爆話做咗幾代東莞人，最近先知遠祖來自浙江杭州，現正搵家族長老幫手畫族譜，方便返去尋根咁話。
Randy話多年前因緣際會去咗浙江為當地政府提供意見，後來加入浙聯會做理事。家族有位七十幾歲嘅疏堂親戚見佢多咗參與浙江事務，先講起佢哋祖先係杭州人，四、五代前先至落腳東莞，Randy笑稱連佢爸爸都唔知添！
佢又講笑話唔怪得以前好多人都話佢爸爸唔似南方人，因為個鼻又直又高。佢都覺得浙江人斯文啲，又有才氣。咦？聽落好似曲線讚緊自己喎？佢笑住澄清，話自己落嚟太耐，才氣已經被溝淡咗喎。
又有多一個同鄉「認祖歸宗」，詹耀良梗係開心。佢話浙江人喺香港號稱有三十萬人，依家搵到六、七萬人，已算唔錯。講起江南多才子，詹耀良笑稱的確有好多本港大學校長係浙江人，例如中文大學前校長馬臨、金耀基同沈祖堯，仲有香港大學前校長徐立之等人。
曹其鏞掛住寧波美食
曹其鏞係浙江寧波人，雖然移居香港幾十年，但係有啲食物都係要返到寧波先至食得開心，例如海瓜子、小黃魚等海鮮。上海總會理事長李德麟同兒子李惟宏都有到場，李惟宏忙住湊未夠一歲嘅囡囡，自嘲個樣愈來愈殘，但李德麟就話要佢生夠四個先得喎。
卓妮