開講有話：「時間就係金錢。」不過市民去公院急症室睇醫生就唔同講法，即使錢花多咗，都一樣買唔到時間，隨時等到海枯石爛都未見到醫生。事關「加價分流」呢招作用不大，港府只識打劫市民荷包，喺醫療制度上就翹埋雙手，試問又點可能醫得好急症室人滿之患呢個「死症」吖。
相信大家都好記得，急症室收費由舊年六月起，由原來嘅一百蚊，大幅加價到一百八十蚊，當時唔少市民抱怨加幅離譜，不過官老爺就睬你都傻，用加價可以防止市民濫用急症室嚟做擋箭牌。好喇，醫管局尋日公布加價一年來急症室求診人數，發現首次求診人次僅僅比往年同期下跌咗百分之四點四，次緊急及非緊急病人下跌咗百分之七點七。即係話，大幅加價八成，減少咗嘅人數一成都冇，狠狠咁摑咗當局一巴，亦都證明所謂嘅杜絕濫用，只係為公院服務差到冇朋友轉移視線啫。
你話唔係咩？睇番醫管局嘅數字吖，緊急病人嘅平均輪候時間不減反增，由之前嘅廿五分鐘增加到廿六分鐘，而喺目標時間內處理緊急病人嘅達標率亦下跌超過兩個百分點。睇到喇，總求診人次下降，但服務表現仲差過之前，唔係前線效率低係乜呀？難為醫管局賴得就賴，話多咗長者求診，要花更多時間溝通同檢驗病歷喎，真係欲卸之責，何患無詞。
講真，醫管局與其搵藉口，不如認真改善服務啦。但凡去過公院急症室睇醫生嘅市民都知，平日坐低等四、五粒鐘就梗o架喇，如果撞正流感高峰期仲大鑊，唔等夠十粒、八粒鐘甚至十幾粒鐘，都咪使旨意見到醫生，有人話小病拖到變大病、大病拖到變絕症就係咁解。急症室價就識加，人手資源就唔增加，市民想唔變望夫石都難。
公營醫療系統資源同人手長期不足，十個煲得七個蓋，已係人所共知嘅事實，淨係公院病床佔用率長期超過百分之一百，唔少病人被迫瞓走廊或瞓洗手盆底，情況已經夠晒嚇人，有病人甚至向林鄭發過公開信炮轟，官老爺絕對冇可能唔知公營醫療遲早爆煲嘅事實，只不過一個二個懶到出汁，淨係想做一日和尚敲一日鐘，兼夾身嬌肉貴，有病都睇私家醫生，絕少會幫襯公院，針唔拮到肉咯喎，咪話之你死囉。
有人話，香港嘅醫療服務同第三世界有得揮，真係冇講錯。港府坐擁金山銀山，但一味以「用者自付」嚟打劫市民，醫管局又只識肥上瘦下，管理一片混亂，基層市民連合格嘅醫療服務都得唔到，想唔承認已經同第三世界睇齊都唔得喇。