政情：怕高脂高鈉 史顏景蓮買麵包機DIY
香港人經常食麵包，不過消費者委員會早前就公布市面上嘅麵包鈉含量高，唔太健康。仁濟總理史顏景蓮話，佢全家都好鍾意食麵包，所以都有留意消委會測試報告，仲拿拿臨去買部麵包機，打算以後自己整麵包，希望健康啲。
佢話自己最鍾意食雞尾包同玉桂包，仔女就喜歡腸仔包同芝士包。佢見到消委會個測試報告指坊間售賣嘅麵包高脂、高鈉，所以就去買咗部麵包機，打算自己整麵包。而佢個女史佩加（Kathleen）咁啱去咗學整麵包糕點，仲特登學整玉桂包孝敬佢，真係啱晒。
為健康少飲珍珠奶茶
近排台式珍珠奶茶風極盛，花款又多，開到成行成市，真係梗有一間喺左近。史顏景蓮話以前都好鍾意飲珍珠奶茶，但為咗健康，所以都少飲喇。而Kathleen同哥哥史昊洺就話，都知依家市面多咗好多款式，黑糖仲係大熱，但好多店舖都要排十幾廿分鐘隊，就費事排喇。Kathleen仲話，好飲嘅珍珠奶茶糖分極高，所以都只係間中先飲吓咋。