後人總結六國滅亡嘅教訓，就係爭相割地討好秦國，「譬猶抱薪救火，薪不盡，火不滅」。呢句說話二千多年後仍有警世意義。睇吓港府咪知囉，淨係識不斷增加資源人手應對假難民，錢就使咗，官位就加咗，問題冇解決之餘仲愈演愈烈，蠢到冇朋友。
咪睇港府沾沾自喜聲稱，自從統一處理及加快甄別免遣返聲請個案後，積壓個案剩番一千三百幾宗，比高峰期逾萬宗大減，好似收到成效咁款，查實只係朝三暮四嘅把戲，事關絕大部分聲請失敗個案都會提出上訴，上訴被駁回仲可以提出司法覆核，結果到家陣仍有萬幾個聲請人滯港，同幾年前冇分別。咁樣一拖再拖，死拖爛拖，幾多假難民喺香港結婚生仔、家族繁衍就係咁解，最筍係打官司嘅錢全部由納稅人包辦，幾大賴死唔走喇。
嗱，不認不認還須認，政務司司長張建宗終於承認聲請上訴個案多到拖垮司法系統咁滯。佢老哥話喎，自舊年起入稟高院原訟庭及上訴庭嘅聲請案件顯著急增，高院原訟庭接獲個案由一五年嘅一百零三宗，暴升至舊年過千宗，截至今年十月更有二千宗司法覆核許可，甚至連入稟終院嘅案件亦大幅飆升，問你死未。司法機構已向港府提出聘任高院司法助理，成立司法學院，建議開設四個高院新職位，增加人手應對，以免影響其他民事案件嘅審理進度喎。
睇到喇，為咗招呼假難民，唔止入境處不斷加開職位，法援署增加人手，家陣連司法機構都要問政府攞錢請人，增加納稅人負擔唔在講，有冇效果先至係最大問題。諗都諗到，假難民之所以前赴後繼，全因行街紙制度猶如犯罪通行證，一紙在手，打黑工又得，打家劫舍又得，勾結黑幫食大茶飯亦得，香港遍地黃金，唔嚟就笨喇。
咁喇，講多無謂，食多會滯，等功夫茶醒三條好橋畀港府，肯跟住做一定一天光晒。上策梗係退出聯合國《禁止酷刑公約》，對假難民即捕即解，一勞永逸；中策就係重設禁閉營，取消行街紙，一旦假難民進入市區掘金嘅財路被切斷，八人大轎請都唔嚟；下策就係規定假難民滯港期間須履行社會服務令，例如洗廁所、清潔沙灘甚至捉老鼠，否則不發津貼兼立即遣返。
正所謂，一張廁紙、一條底褲都有佢嘅用處。香港衞生情況每況愈下，鼠患、蚊患仲攻陷全港，假難民身強力壯，搵佢哋捉老鼠搞清潔就Fit晒。呢個重任最好交由假難民之父之母帶領，一齊落手落腳搞好衞生，到時班友掛住洗廁所捉老鼠，咪唔得閒無事生非囉。