政情：劉仲恒借鏡建造業 助安老服務吸新血
依家有啲行業面對「有工無人做」嘅問題，除咗飲食業大嘆請人難，安老服務業更加係長期缺乏新血加入。行業培訓諮詢委員會（安老服務業）成員劉仲恒認為可參考建造業吸新血嘅方法，以專業形象吸引多啲年輕人加入安老服務業。
年輕人唔入行恐要靠外勞
劉仲恒早前參觀樂齡博覽會，見識到好多照顧長者嘅先進器材，好似扶抱器械同監察生理狀況嘅智能產品，雖然係可以減輕照顧長者嘅體力負擔，但始終都無法完全取代人手，而目前安老服務就係頭痛於願意投身嘅人太少，好多安老院舍嘅職工，同佢哋服務對象嘅年齡已相差無幾，由於年輕人都唔肯入行，將來安老院舍要維持服務，恐怕只有輸入外勞。
輸入外勞極具爭議，佢亦話難免會遇到阻力，所以亦要想辦法吸引本地年輕人入行至得，而呢方面建造業就做得出色，例如建造業近年識得塑造從業員專業同魄力嘅形象，逐步洗脫過往地盤佬嘅粗魯感覺，以招攬更多本地年輕人加入，佢仲話建造業吸引新血嘅做法，值得安老服務業參考。