政情：阻撤MPF對沖開位 鍾國斌滑鐵盧
取消強積金對沖終極方案引起商界不滿，但勞工及福利局已向立法會建議喺勞工處開設一個首席勞工事務主任嘅常額職位處理相關事務。立法會人事編制小組委員會尋日召開會議，極力反對取消對沖嘅自由黨議員鍾國斌再度「出招」，提臨時動議要求將有關職位改為編外，最終滑鐵盧，開位建議獲通過，將交付財委會審議。
唔少議員都質疑點解當局直接申請開設常額而唔係短期嘅編外職位，小組主席葉劉淑儀亦指喺法例獲得通過「十畫都係得半撇之下」，建議轉為兩至三年嘅編外職位，呼籲勞福局副局長徐英偉「返去請示吓你局長（羅致光）」，可能有助通過建議。
郭偉強鬧臨時動議如拉布
鍾國斌就話好多中小微企擔心取消對沖後，無法有充足儲備應付額外支出，認為喺未有共識下唔應該開設常額職位，質疑點解當局仍要「硬推」不切實際嘅方案，之後仲提臨時動議，要求將有關常額職位轉為編外，以便取消對沖唔能夠落實時，唔使長期開設有關職位。雖則臨時動議獲通過展開辯論，但最終被否決。
工聯會郭偉強更鬧爆鍾嘅議案如同反對派以往拉布一樣，直指只有鍾唔希望落實取消對沖，認為方案要到二○二二年先落實已經好遲，若再有任何拉布拖延落實日期，僱員權益就一再延遲獲得保障。