政情：拍片籲打流感針 袁國勇太長氣畀人「圈」
冬季流感高峰期即將殺到，港島西醫院聯網為咗呼籲市民打流感針，不惜聯同港大微生物學系講座教授袁國勇，夾手「出賣」聯網感染控制主任鄭智聰同瑪麗醫院副行政總裁徐錫漢，話假如聯網內有五成同事打流感針，鄭同徐兩位醫生就會跳舞，兩人亦已開始練舞準備做「找數真漢子」。
惡搞籌款騷 王賢誌扮接線生
港島西醫院聯網以惡搞方式，抄東華三院每年搞嘅大型籌款騷《歡樂滿東華》嘅橋段，拍咗一段約三分鐘嘅「歡樂滿一針」短片，仲搵嚟多位名人客串，包括片頭唱歌指打針可以保平安嘅殿堂級歌手葉麗儀、陳潔靈同肥媽，同埋片尾以彩蛋現身充當電話接線生嘅東華三院主席王賢誌等等。
聯網亦高層盡出，總監李德麗扮演女司儀，袁國勇就做番自己，原本應負責講解流感針作用，但片中觀眾嫌佢長氣喺咁圈佢，結果「飛片」了事，相當搞笑。另一爆笑位係聯網內有五成同事打流感針，鄭智聰同徐錫漢就要跳舞回報，畫面更顯示要着泳褲同戴泳帽添！唔知兩位醫生屆時「找數」時，係咪真係會表演泳裝舞呢？