政情：封殺峯鴿 高佬賢被拉伕 落火坑選副主席

傾垃圾徵費 峯鴿搶位建制變陣

由於垃圾徵費喺地區反對聲大，面對明後兩年選舉年，建制派都難以「盲撐」，所以無直選議員有興趣做法案委員會正副主席，經多次磋商都冇最終定案。尋日早上八時半同時有法案委員會同人事編制小組委員會會議，建制同民主兩派議員淨係冧友去開法案委員會，但大家都係施施然到來。

喺八時廿六分左右，法案委員會會議室內只有數名議員，環境局政治助理區詠芷（Michelle）密密打電話搵人，突然間Michelle好開心去同建制派議員講「佢OK、佢OK」，之後民記主席李慧琼就急急腳到會議室向其他議員拍膊頭話「高佬（賢）想做副主席」，而工程界盧偉國聽到後即捉住Michelle話「佢唔係斷言拒絕(口架)咩？」

會議開始後，高佬賢先急急腳入會議室，連恤衫衫鈕都係入到房先扣，睇嚟真係好突然決定頂上，而基於隔籬人事編制小組唔夠人，建制派一投完票就起行轉房。據了解，一度傳出會計界梁繼昌會參選，但及後卻變成峯鴿，令建制派有憂慮，坦言搶手機事件喺佢哋心內「有條刺」，為免喺無人競爭下畀峯鴿當選，大家積極游說高佬賢。

話唔係臨急頂上 強調法例重要

問到係咪臨急頂上，高佬賢否認兼笑話自己唔係「裙拉褲甩」開會，平時都係入到會議室先扣起恤衫第二粒鈕。佢又強調呢條法例好重要，好多市民受到影響，認為一位唔太正常嘅議員難勝任副主席一職。好耐冇做法案委員會主席嘅馬逢國就話都係本周一晚十時先決定加入委員會，及後「六人組」就游說佢做主席，尋日朝早開會前先睇文件添！

垃圾徵費難搞，建制派都心知肚明發生乜嘢事，但不論幾唔想接手，都唔想畀峯鴿做，惟有委以重任畀兩位無包袱嘅功能界別議員。正所謂「我不入地獄，誰入地獄」，高佬賢明知係火坑都要跳o架喇！