中環出更：周定宇創學生活力操弘揚武術文化
要挑戰世界紀錄並唔容易。傑出青年協會（傑青會）尋日邀請二十間中小學共二千四百位學生，齊集沙田運動場一齊紮馬同埋做武術活力操，圖創下世界紀錄。作為籌委會主席嘅前世界武術冠軍周定宇，仲設計咗一套糅合武術同健體嘅活力操動作，務求參與嘅學生都可以輕鬆掌握傳統武術嘅基本架式。
本來萬事俱備一切都按計劃進行，點知活動開始前點算人數出現耽誤，因好多學生都要喺時限前返回學校，惟有打消破紮馬世界紀錄嘅打算。事後周定宇認為雖然取消咗呢個項目，但參與活動嘅學生都因挑戰世界紀錄之舉而對中國武術有所接觸，都算係達到弘揚武術文化嘅目的。
姜炳耀強調學紮馬好重要
傑青會主席余嫿、副主席鍾志樂、執行委員陳建强同傑青會前主席姜炳耀都有嚟撐場。其中姜炳耀自小就接觸武術，自然經歷過苦練紮馬嘅階段。佢話中國功夫有部分鍛煉看似同打鬥無關，紮馬就係其一，但當佢後來學習舞獅，手舉沉重嘅獅頭再喺梅花樁上跳躍，先知當初嘅紮馬基礎係何其重要。食過「夜粥」嘅佢又話習武唔止係拳腳嘅鍛煉，亦涉及品格嘅修為，尤其係年輕人血氣方剛，須有良師開導以明瞭武術招式，而唔係單純擊敗對方為目的，否則就可能會好勇鬥狠同誤入歧途。
另一位傑青會前主席林景昇就坦白話，自己從來未學過中國武術，但係以前喺警察學堂習得嘅防衞術，今日仍然記得好清楚。佢話警察嘅防衞招式有好多，但原則都不外乎係盡量避免同對方糾纏，同促使對方放棄暴力，咁就可以減少雙方都受到傷害嘅機會，雖然警察防衞術唔係傳統武術，但喺止戈為武嘅概念上，彼此又相當一致。
卓妮