都市固體廢物徵費拖拉多年，政府終於喺上月刊憲同向立法會提交草案，最快後年年底落實，而處理有關草案嘅法案委員會將於聽日首次舉行會議，並選出正副主席，不過今次似乎連建制派都未必想接手呢個燙手山芋，為政府護航喇。
上星期議會陣線朱凱廸意外地出任有關橫洲事宜嘅小組委員會主席，建制派今次唔會再讓泛民偷雞成功。截至尋日早上十點半，已經有廿八名議員加入法案委員會，人數已反映草案有一定爭議性。有建制派議員坦言地區有強烈反對聲音，所以難有地區直選議員願意出任主席，再加上實施時間接近立法會換屆選舉或會影響選情，難怪大家對主席一職全無興趣。
此外，民建聯過去對都市固體廢物徵費有強烈意見，自由黨上星期先喺工務小組拉冧議案，所以據聞呢兩個黨都唔啱做主席，而工程界盧偉國就係政府屬意人士，但建制派對佢主持會議頗有意見，所以只能向獨立議員埋手。其中議員何君堯雖為直選出身，但呢三年都有擔任環境事務委員會正副主席，而早前參觀小蠔灣有機資源回收中心又只有佢一人畀面去，或者今次會叫佢捱義氣頂硬上喇！