中環出更：特首辦累新聞處甩轆 出錯林鄭沈春耀合照
香港沉淪，政府新聞處又再「甩轆」收場！香港基本法委員會主任沈春耀履新後首次訪港，昨日出席多場活動，包括昨午到禮賓府同特首林鄭月娥等港府高官會面，政府新聞處按慣例事後發稿，簡述雙方會面內容，並上載兩人合照，但點知「甩轆」收場，上載咗林鄭同中國社會科學院院長謝伏瞻上周嘅合照，據報約十分鐘才發現事件，更正上載番林鄭同沈春耀合照，特首辦事後「認衰」，原來係佢哋手民之誤畀錯相。
特首辦發言人表示，較早前因手民之誤，一度錯誤發放會面照片，發現後已盡快糾正，謹此就引起混亂致歉。
新聞處一錯再錯
翻查資料顯示，新聞處今次「甩轆」非首次，上次係今年中，上載特首喺行政會議前會見傳媒嘅講話全文，其中一次竟然將國家主席習近平嘅名錯寫為「習平近」，事後發現先作出更正。
其實新聞處短短半年時間一而再出事，既有新聞處自行「甩轆」，亦有畀人累到「甩轆」，有關方面係咪有需要檢視吓出相同出稿嘅流程，以免再有同類事件發生呢？
卓妮