中環出更：轉工可考慮中小企 麥美儀：福利低但起薪點高
臨近年尾，又到打工仔攞完雙糧考慮轉工嘅旺季，有調查指香港明年加薪幅度喺亞洲排尾六，或令更多人想轉換環境。卓妮早排喺香港中小型企業聯合會（聯合會）舉行嘅星級品牌頒獎典禮上，同唔少僱主傾開呢個話題。聯合會會長麥美儀就話，中小企嘅福利低，但起薪點高，睇嚟打工仔轉工都可以考慮吓中小企喎！
麥美儀話，中小企因為福利唔夠大企業吸引，比較難請人，所以一般願意出較高嘅薪金作招徠。佢又話，科技令到企業嘅人手分配有變化，好似佢經營酒生意，因為開拓咗網上購物平台而令銷售員人手有所減省。
有份獲獎嘅慈善機構嗇色園主席馬澤華同副主席黎澤森都有到場，馬澤華就話，非牟利機構薪酬跟得上市場，因為有政府津貼幫忙，而佢哋經董事會同意亦可以增加撥款作津貼，直言「唔夠搭到夠」，所以無大批員工流失嘅情況出現。
馬澤華又話，嗇色園負責管理黃大仙祠呢個香港人相當熟悉嘅品牌，要跟隨前人喺宗教方面打下嘅基礎之餘，都要引入現代管理模式。好似佢哋嘅董事會成員來自不同專業，又將有求必應嘅方針轉去推廣普濟勸善，直言要不停轉變先可以持續發展。
簡汝謙教企業微調市場策略
到場支持嘅國際青年商會香港總會會長簡汝謙就認為，近年本地企業多咗唔少宣傳新渠道，好似趁光棍節呢啲網絡購物節日搞減價促銷。佢就建議企業可以適時微調市場策略，例如多啲了解年輕人口味，發掘吓網絡紅人咁話。
卓妮