政情：黃之鋒趁G20峰會 邀西方干預港務
官司纏身嘅香港眾志秘書長黃之鋒於兩個多月前向法官申請離港被拒，冇得喺外國「唱衰香港」，惟有透過報章撰文邀請外部勢力干預香港，佢近日於美國《華盛頓郵報》撰文，以為何西方社會要喺二十國集團峰會（G20）期間關注香港困局為題，稱過去兩年多時間，先有眾志前主席羅冠聰被取消立法會議員資格，其後眾志前常委周庭又被拒參與立法會補選，再加上「政治檢控抗爭者成為新常態」，例子係早前因旺暴案被判囚六年嘅本土民主前線前發言人梁天琦。
黃之鋒稱香港傳統上係中國同世界之間嘅重要橋樑，而香港嘅成功有賴於法治、自由等，佢聲言中國嘅銳實力喺多方面影響香港，其目的係透過經濟，而非人權等共同價值建立新嘅國際秩序，而適逢G20正在阿根廷舉行，外界可趁此機會去發聲，關注包括香港在內嘅情況。
每隔一排撰文唱衰香港
翻查資料顯示，黃之鋒每隔一段時間就會撰文主動邀請外部勢力介入關注香港，上次係十月中，時任外國記者會副主席馬凱不獲港府續發工作簽證後，黃於《時代》雜誌撰文形容係「大事件」，批評事件令香港言論自由受損，呼籲英美政府施壓介入。