中環出更:重提港台新大樓闖關 峯鴿幫倒忙

最新一份審計報告炮轟香港電台多宗罪,包括港台電視31/31A收視率奇低,今年首六個月平均收視率僅得零點一,加上逾半時數屬重播節目「炒冷飯」等。此時此刻,官司纏身嘅民主黨立法會議員「峯鴿」許智峯突然提出口頭質詢,問當局會否將港台新廣播大樓工程項目提交立法會審議,峯鴿喺港台呢個風頭火勢之時火上加油,睇嚟想送港台一程。

正值捱轟之際 火上加油

根據立法會內務委員會最新文件顯示,峯鴿於下周三(12日)嘅口頭質詢,提到工務小組於二○一四年否決港台新大樓後,政府至今仍未將項目重新提交予立法會審議,之後佢話審計署第七十一號報告書提及港台營運資源事宜,佢關注政府會否將港台新大樓工程項目提交立法會審議,另外有否計劃將港台改組脫離政府架構,令港台免受任何政治及商業因素影響。

雖然峯鴿嘅質詢內容無詳細提及港台被炮轟嘅多宗罪,但係咪以為「唔講就唔存在」,因為政界一早對於港台浪費公帑,陰陽怪氣嘅作風甚有意見,再說,高官於十月下旬先公開承認新大樓計劃嘅優先次序唔高,峯鴿突然重新跟進港台新大樓幾時再闖關立法會,睇怕注定係煲冇米粥收場。

卓妮

第一手消息請下載on.cc東網iPhone/iPad/Android/Windows Phone Apps