中環出更：優雅暗藏童趣蔡毅明潮着旗袍
旗袍散發濃烈嘅古典味，如果想着得潮啲，喺圖案上玩創意不失為一個好方法。創立摩登旗袍品牌嘅設計師蔡毅明（Grace）早前舉行新系列時裝騷，將十足西化嘅米奇老鼠圖案着上身。咪以為離遠幾呎就會見到大大隻卡通圖案，Grace好巧妙咁將米奇老鼠「收埋」咗，當日佢抱住混血兒囝囝Max亮相，兩人着住嘅中式母子裝就暗藏百厭嘅米奇喇。
Grace笑笑口話，着旗袍都可以着得優雅同埋可愛，今次佢設計嘅米奇圖案只係好低調咁出現，其中佢最鍾意自己着緊嗰塊布，所以特登訂造一件粉紅色旗袍嚟着。佢亦為囝囝設計咗一件中式功夫褸仔，雖然顏色唔同，但都係同一個圖案。睇嚟佢真係好鍾意呢個設計噃。
蔡關穎琴鍾情冇衩設計
中華總商會會長蔡冠深嘅太太蔡關穎琴都着住件黃色旗袍到場，件旗袍企領係絲質料，夠晒透氣同特別。蔡太笑言，佢讀書時嘅校服係旗袍，但係開衩位經常被佢整爛晒，所以依家鍾意着冇衩嘅旗袍，咁就冇咁易爛喇。
現身欣賞時裝騷嘅仲有長衫薈成員伍婉婷、朱穎詩同金紫荊女企業家協會執委沈貝嘉（Anita）。五歲就移民澳洲嘅Anita講得一口流利普通話，唔講仲以為係佢嘅母語，不過其實佢係香港人，喺澳洲讀完大學先返港，所以成個鬼妹咁，而普通話只係佢喺澳洲時先至學嘅。講起社會有唔少聲音反對中小學用普通話教中文，開設漢語學習中心嘅Anita就話，語言唔係翻譯員或翻譯機可以取代，學識多一種語言，喺必要時幫到忙，咁就係一種好語言，奉勸大家唔使咁敏感喎。
卓妮