政情：卿姐戴LSE博士帽 亞洲女性第一人
立法會前議員劉慧卿（卿姐）喺香港政壇無人不識，近日佢就讀碩士嘅母校倫敦政治經濟學院（LSE）來信，告知將向佢頒授名譽理學（社會科學）博士學位，料將成為香港乃至亞洲第一位獲頒呢個博士銜嘅女性。
工作受肯定感榮幸
卿姐前晚收到嚟自LSE校長嘅來信，指下年七月向佢頒發有關名譽學位，信中更指出，呢個名譽學位只頒授予喺某個領域有突出同卓越成就，實踐學院使命並改善社會嘅人物。學院又話屆時會喺倫敦舉行頒授儀式，並會設晚宴祝賀得主。卿姐就話對獲頒授學位感到榮幸，認為學院係對佢過去爭取民主自由同人權工作嘅肯定。