正所謂好事不出門，醜事傳千里。浸大學生日前喺宿舍開生日派對，期間互撒麵粉，引發粉塵爆炸，搞到引火焚身，唔止受傷學生嘅家長痛心，亦引來全城熱議。有人就話應該吸取教訓，對大學生加強教育，等佢哋搞活動時注意潛在危險，咪再樂極生悲喎。望係咁望喇，最怕大學生未必聽得入耳啫。
好似前消防處處長尋日講起呢件事，都忍唔住暗寸大學生冇記性。佢話喎，雖然香港冇乜發生粉塵爆炸意外，但三年前台灣八仙水上樂園塵爆慘劇，大部分香港人都會記得。言下之意，咪即係話現今大學生兩耳不聞天下事囉，玩到乜都唔記得囉。佢仲話，今次學生嘅行為太大意，呼籲政府加強教育，喺舉行活動前進行風險評估喎。
即係咁，大學生玩火自焚，教訓深刻，有學生兩成皮膚燒傷，至今仍然留醫，苛責佢哋可能係不近人情，之但係大學生已經係成年人，必須對自己嘅所作所為負責，何況政府每年用於資助大學學位嘅開支並非小數目，納稅人個個有份出錢，社會人士睇到大學生玩到連安全都不顧，隨時害己害人，點止失望，直情激氣喇。
即使撇開粉塵爆炸唔講，攞麵粉嚟玩都唔啱。難為浸大學生會前會長仲話，撒麵粉可以等大家玩得「放啲」，呢種講法就夠晒牽強。係人都知唔應該浪費食物，不過本地唔少大學生好似同食物有仇，幾乎不同院校都發生過學生向食肆（才窊）贊助，到頭來活動取消，既冇通知，又甩底冇影，做事冇尾飛陀，仲要堂而皇之講到自己冇錯咁款。咁搞法，想社會人士對大學生有好印象都難，唔通又要再教育呢班未來社會棟樑珍惜食物咩？
講來講去，本地大學生嘅荒唐事，三日三夜都講唔完，唔係大學迎新活動淪為淫亂派對，就係有「老鬼」要大學新生喺已故教授嘅弔唁冊上塗鴉，不知尊重為何物。時下年輕一代嬌生慣養，唯我獨尊，加上近年大學校園泛政治化，大學生被別有用心嘅政客落藥，視「違法達義」為時尚，以為無視固有規矩，就代表敢於突破常規。偏偏校方管理層又採取鴕鳥政策息事寧人，尤其係浸大年頭至爆出佔領語文中心事件，唔知係咪見到學生反彈極大，變成日後犯錯都唔敢苛責半句。唔敢嚴管學生咯喎，咪養成學生目空一切嘅心理囉。
都係嗰句喇，大學之道在明明德，唔係在於玩麵粉，更加唔係在於玩火。經一事、長一智，希望佢哋嘗過撞板嘅痛苦滋味，日後會吸取教訓喇。