政情：黃嘉純再添公職 出任社諮會主席
政府尋日公布由香港城市大學校董會主席黃嘉純出任社會福利諮詢委員會（社諮會）新一任主席，代替社諮會現任主席羅榮生，任期兩年，下月一日生效。 本身為律師事務所合夥人嘅黃早前已擔任語文教育及研究常務委員會主席、去年又獲委任為城大校董會主席，同時仲係證券及期貨事務監察委員會非執董同多個委員會委員，真係公職多籮籮，唔知會唔會分身不暇呢？
仲有6名新成員
羅榮生領導社諮會六年，嚟緊社諮會就由黃嘉純掌舵喇，而該會同時亦有六名新成員，分別係博士白雪、張思穎、何永昌、醫生林國基、黃靜虹同黃健偉。而五名即將離任嘅成員就包括博士鄭麗玲、博士鍾志平、何海明、李美辰、同李律仁。
另外，政府尋日亦都公布再度委任三名立法會議員，包括衞生服務界李國麟、麥美娟同胡志偉出任市區重建局董事會非執行董事，任期兩年，由下月一日至二○二○年十一月三十日。