政情：摩頓臺排球場改建風波 張華峰梁繼昌鬥住得耐
立法會財務委員會尋日審議灣仔社區重點工程項目，把銅鑼灣摩頓臺排球場改建為活動中心，會計界議員梁繼昌（Kenneth）自爆住喺附近，一直見到排球場好多人用，不過言猶在耳，金融服務界議員張華峰（肥老闆）其後發言時話自己喺Kenneth未出世時已住喺度，實行鬥住得耐咁話。
菲印駐港領事問點解要拆
Kenneth話，見到摩頓臺排球場成日都有人用，又話同印尼、菲律賓駐港領事傾過，對方都問點解要拆咗個排球場；肥老闆發言時疑挑機，稱「我住喺摩頓臺附近時，佢（Kenneth）都未出世」，又話自己當年想打乒乓波而非排球，認為重建成活動中心，市民有得揀先係好。
另外，身兼東區區議員嘅工聯會郭偉強話，摩頓臺排球場改建活動中心已獲灣仔區議會通過，批評部分人聲稱要下放權力予區議會，但實際係「講一套、做一套」，變相喺立法會限制區議會作出嘅決定；民主黨林卓廷反駁，立法會同區議會都係民意機關，互不從屬，聲稱立法會唔能夠做區議會嘅橡皮圖章。