政情：泛民外訪 鑊鑊唱衰香港 建制內會輪流狙擊

中美貿易戰如火如荼，所以今次建制派同泛民議員都一致支持就貿易戰對本港經濟影響進行討論。立法會議員周浩鼎喺尋日內會發言時強調，貿易戰備受關注，對香港影響深遠，一旦外國長期接收關於香港嘅負面訊息，會誤以為香港情況好差，影響香港嘅國際地位同聲譽。佢又話，其實大家都想香港好，喺一國兩制下，香港同其他國家包括美國嘅關係都好重要，叫啲泛民唔好成日外訪唱衰香港，喺當前形勢雪上加霜咁話。

同屬建制陣營嘅立法會議員梁美芬亦都向泛民開火，話香港本身並唔差，一國兩制可以保到香港嘅經濟地位、貿易自由同有獨立關稅區，又大鬧泛民成日去外國唱衰，搞到人哋淨係記得香港啲衰嘢，唔記得晒香港嘅優點，所以佢都支持今次休會辯論，等大家可以正面啲去討論番貿易戰。

黃國健：唔好成日講風涼話

議員黃國健亦都加入戰團，話貿易戰雖然對香港造成衝擊，但就唔好講到世界末日咁，應該客觀去睇呢啲衝擊，而非將影響誇大，恐嚇市民。佢仲話︰「覆巢之下豈有完卵」，如果泛民搞到中美關係變差，香港都好難置身事外︰「人哋有心搞你，總有藉口玩你」，奉勸泛民唔好成日喺呢個時勢講風涼話。

泛民成日唱衰香港又點止影響本港同外國關係，仲會趕絕外國人才。議員郭偉強直斥部分泛民議員外訪時唔止冇喺國際宣揚香港優勢，反而藉住唔同政治議題唱衰香港，搞到外國專才誤以為香港環境好亂，唔敢嚟香港發展。

黃碧雲死撐：係想保住香港

面對建制派連番狙擊，泛民就繼續死撐，其中議員黃碧雲話，周圍外訪只係叫人唔好喺中美貿易戰上傷害香港，係想講清楚香港特點，保住呢個城市。而議員楊岳橋就話香港係食「四方飯」，唔可能做鴕鳥，只係匿埋對住四面牆，所以要講畀外國聽香港嘅情況，佢仲建議不如下次同建制派一齊外訪一齊講，咁就唔驚泛民唱衰香港喎。