政情：八網難逃：劉吳惠蘭蒲頭 孖前高官食壽包
商務及經濟發展局前局長劉吳惠蘭離開官場後，都鮮有喺公眾場合露面，近日竟然喺一個聚餐見到佢喎，原來佢同懲教署前一哥單日堅、勞工及福利局前局長蕭偉強（WK）係同學嚟o架，仲一齊食壽包添！
話說WK日前喺Facebook貼文同上載咗幾張相，踢爆咗佢哋係四十七屆清華大學國情班嘅同學，當年仲係由劉吳惠蘭做團長添！而喺讀完國情班之後，一班同學每年都有兩三次聚餐，WK形容成班同學都好盡歡o架！時光飛逝，今年就迎接十五周年嘞，又話依家各公務員同學陸續退休，剩低兩位都會明年中食糧。
包上印有同學名
WK仲話單日堅喺今次聚餐仲帶嚟驚喜，為十五周年準備大壽包之餘，仲好窩心咁為每一個同學準備印上名字嘅小壽包（圓圖），讚佢不愧係一哥喎。有網友睇到啲壽包，即刻矯正話：「電視節目教我們說不是壽包！是壽桃包。」WK就隨即反問：「乜唔係 pat pat 包咩？」認真搞笑。