政情:白鴿黨冇人選 尹兆堅或翻兜選副主席

民主黨(白鴿黨)將於下月初改選中委會,選出新一屆領導層。據知,現任副主席之一嘅沙田區議員李永成放棄角逐連任,消息指曾任黨副主席兩年嘅立法會議員尹兆堅,擬翻兜再競逐副主席。

冇刻意估計勝算

尹兆堅回應時承認有意角逐黨內副主席一職。佢解釋,喺上一次改選時,因為撞正立法會選舉,當時希望集中立法會嘅工作,所以冇參與黨內選舉。至於今屆點解參選,佢就話自己有經驗,同埋雖然依家冇做副主席,但都有繼續幫手處理相關嘅協調工作,而且即使做咗議員,職務方面變化不大,再加上暫時都未聽到有人打算參選,所以決定再次參選黨內職務。

咁勝算有幾大?佢話冇刻意估計勝算,但都會積極準備,例如做競選承諾書,希望會員到時會做出公平、理性嘅決定。至於今次民主黨內改選領導層方面,現任黨主席兼立法會議員胡志偉、現任副主席兼南區區議員羅健熙預計會繼續競逐連任。

第一手消息請下載on.cc東網iPhone/iPad/Android/Windows Phone Apps