中環出更：邵家臻冇開會 筆戰羅致光
佔中案喺本周一正式開審，被告之一、社福界議員邵家臻因需上庭，未能出席多個立法會會議，但佢仍堅持同勞工及福利局局長羅致光筆戰。兩人再度隔空開火，邵家臻進擊，就當局申請喺勞工處開位處理強積金（MPF）對沖，以及計劃收回展亮技能發展中心觀塘校舍用作設立公務員學院，提出多條問題。
立法會人事編制小組委員會前日開會審議勞福局開位建議，無論商界同勞工界議員都插爆與會嘅勞福局副局長徐英偉，有商界嘅議員仲鬧徐英偉態度Hea添！
曾去信勞福局 促回應提問
由於邵家臻要出庭，去唔到開會，所以提早去信委員會主席葉劉淑儀，要求勞福局回應四大提問，包括新職位有乜嘢策略平衡勞資意見，而唔係偏重資方；勞工處未來會點樣收集勞資雙方意見；新職位喺處理外判工上有冇角色；以及新職位如何保障工人權益。另外，佢亦就展亮中心事宜去信立法會福利事務委員會。
其實羅致光上任以來，同邵家臻戰火不斷，由院舍人均面積鬥到一筆過撥款，今次竟然連MPF都唔放過，睇嚟呢對「冤家」都有排鬥，唔知羅致光點樣迎戰呢？
卓妮