古時候有「長安米貴，居大不易」之嘆，今日嘅香港有過之而無不及，甚至市民想睇場演唱會輕鬆一下，紓緩壓力，都因為黃牛黨肆虐而一票難求，你話家陣做香港人怎一個慘字了得吖。
好似早前天王演唱會公開發售門票釀成血案，排頭位嘅內地漢被人揮刀亂劈，好彩冇搞出人命咋，但足以反映排隊買飛已變成高危活動。咁仲唔止，黃牛黨近年多咗南亞假難民加入，呢班友仔憑住一張「行街紙」行走江湖，提早一頭半個月瞓街霸位掃飛，無本生利，為口奔馳嘅小市民點夠佢哋玩吖。所以話啫，當局對黃牛黨之禍不聞不問，點止製造唔公平，直情係助紂為虐喇。
可能畀人鬧得多知衰啩，當局向立法會提交文件，考慮修例打擊黃牛黨喎，包括將紅館、伊館等康文署轄下場地一併納入《公共娛樂場所條例》規管，日後炒飛會列為刑事罪行，並且推行實名制及調整公開門票供應比例等。
即係咁，現時演唱會主辦機構只需將兩成門票公開發售，已符合租用場地要求，換言之最多可保留八成座位作內部銷售，求過於供咯喎，門票往往被炒高數倍甚至數十倍就係咁解。其實對付黃牛黨並非冇辦法，世界好多大城市早已實行實名購票制度，部分活動仲要抽籤添，雖然未至於完全杜絕炒賣活動，但起碼增加佢哋嘅經營成本。家陣港府「見賢思齊」係好事，弊在眼高手低，做唔做得到就係另一回事啫。
點解咁講？鬼咩，一講到實名制及提高公開售票比例，業界即刻鬼殺咁嘈，話咁做欠缺靈活，扼殺佢哋爭取贊助商支持，仲形容為「抱薪救火」添。你知喇，港府慣性一遇阻力即跪低，而且永遠以業界利益凌駕公眾利益，所謂研究修例，恐怕最後又係反彈太大而不了了之咋。再講吖，家陣炒黃牛飛就算被捉個正着，都係罰款二千蚊咁大把，完全冇阻嚇力，既然炒賣一張門票嘅利潤足夠交幾張罰單，唔大幅提高罰款，咪即係嘥氣。
真係諗極唔明，打擊黃牛黨並唔係乜嘢大陣仗嘅事，偏偏港府前怕狼、後怕虎，連實名制實施細節係點，點樣確保私隱安全，如何調整公開售票比例，統統欠奉，難怪被立法會議員鬧爆冇誠意冇擔當。他山之石，可以攻玉，美國一早推行「公平交易法」，規定轉售門票最多只可加價百分之十，港府言必稱國際標準，點解唔學吓嘢呢？
冇計喇，港產官僚向來係語言嘅巨人，行動嘅侏儒，以其一貫拖拉嘅施政作風，怕且等到二○四七，黃牛黨一樣係五十年不變咋。