政情：不在席 投錯票 建制連環甩轆
近來建制派同民主派似係玩緊角色對調，連一向由民主派提出點人數都改為建制派做，唔知係咪少做開「反叛」嘢，搞到連番甩轆！話說尋日立法會大會期間，先有建制派班長廖長江疑似幫兄弟「補鑊」要求點算法定人數，差一分鐘多少少險流會；工聯會陸頌雄不在席，冇得提修正案，民建聯李慧琼仲投錯票添！
陸頌雄冇得提修正案
喺會議準備審議延展五項同港珠澳大橋開通有關附屬法例修訂期限嘅擬議決議案時，負責動議嘅航運交通界議員易志明不在席，廖長江就提出點算法定人數，喺打鐘嗰秒，易就行入會議廳，但全部民主派都不在席，最終喺十三分十一秒先夠人。
到咗下晝辯論無法律約束力嘅「重整港鐵公司管治」議案時，有份提修正案嘅陸頌雄不在席，大會主席梁君彥拒絕處理，就算陸想反駁梁無提示佢亦不得要領。而至投民建聯陳恒鑌提嘅修正案時，由於多名議員棄權所以被否決，但李慧琼就突然好尷尬起身，話唔好意思佢係支持修正案先係真喎。