政情：梁美芬大騷特區護照 追問國民身份認同

梁美芬提出有關推廣憲法同《基本法》嘅質詢，政制及內地事務局局長聶德權就話該局同民政事務局分別預留約一千七百萬及六百萬元，喺一八至一九年度用嚟推廣同宣傳，又講到憲法同《基本法》共同構成特別行政區嘅憲政基礎，政府有責任倡導市民全面認識，未來亦會提供機會畀青年人親身體驗同實踐一國兩制，以更全面理解。

梁美芬似乎對局方回覆唔太滿意，話聶德權所言耳熟能詳，又彈過往推廣流於表面，之後就隨手拎起本香港特區護照，話唔少人填表寫國籍做香港，久而久之產生香港國籍、修改《基本法》第一條等謬論，問政府有冇正視香港人國民身份認同問題，利用特區護照去推廣咁話。

聶德權同意身份感情要雙向

聶德權就話有唔同嘅宣傳推廣渠道，以往宣傳片都有用類似護照方式，更話同意感情就係感情，國民身份同感情都要雙向先得，但若果發現青年人有唔同睇法就要嘗試了解，將憲法同《基本法》內容作客觀理性討論。