政情：打針除衫怕醜 邵家輝問攞乳貼
近年冬季流感疫情嚴峻，政府推出多個資助計劃鼓勵市民盡早接種疫苗。食物及衞生局局長陳肇始尋日領軍到立法會，幫議員接種流感疫苗，但就掀起一眾男議員騷肌潮，有議員更因為無着底衫打趣問護士攞乳貼，而陳肇始仲公開叫一名男議員「除喇，除衫喇，除一半？」唔通佢睇肌睇上癮？
女職員：大家好期待
逾二十名議員輪流去打針，批發及零售界邵家輝就一早解開幾粒衫鈕入場，但眼見太多傳媒，自己又無着底衫驚露點，一嚟就問有冇乳貼。最後為免尷尬佢就喺屏風後打針，出嚟時唔少秘書處女職員問佢做乜唔出嚟打，直言「大家好期待喎」！
另一位脫衣男就係近來減肥成功嘅陳志全，貼身底衫令佢嘅腹肌一覽無遺，盧偉國行過都笑佢識搶鏡，莫乃光更話：「你又借啲意除衫？」最後一位脫衣男就係陸頌雄，當佢着住底衫打緊針時，西裝骨骨嘅陳克勤步入會場即嗌：「搞咩啊？唔使除到咁啊？」到佢打針時，恤衫手袖太緊，陳肇始就氹佢除衫，話除一半都好，陳克勤耍手擰頭怕怕醜醜去到屏風後打針。