政情：郭家麒違規靠害搞到煲底禁搭台

立法會秘書處尋日發電郵通知各議員，立法會指定示威區守則新增一項「禁止使用、放置、豎設或存放任何舞台、舞台連背景幕或秘書處職員認為會構成安全危險嘅臨時構建築物」。有消息人士透露，今次行管會加例係針對郭家麒。

豬隊友理虧 郭榮鏗譚文豪唔幫口

話說郭家麒今年四月喺煲底舉行聲援香港大學法律系副教授戴耀廷去台灣「播獨」嘅集會，當時秘書處職員已指出活動搭建嘅舞台超過准許尺寸，但係郭家麒拍拍心口，表明一力承擔後果，最終佢事後被行管會發警告信，但佢就繼續死撐舞台只係較規定高出○點二米，仲反鬧行管會主席梁君彥係小事化大。

據了解，行管會討論新指引當日，兩名身兼行管會成員嘅公文袋議員譚文豪同郭榮鏗，分別缺席同埋喺位唔出聲。睇怕佢哋都自知「豬隊友」理虧，所以唔願幫口辯護。

至於煲底對出嘅立法會廣場，就繼續容許設立臨時舞台，但必須要在四星期之前以書面方式通知秘書處，而舞台高度唔能夠超過○點五米，舞台連背景幕嘅高度唔超過一米七。

行管會成員謝偉俊話今次收緊煲底守則唔係針對示威議題，純粹係關乎示威方式，否認係針對民主派陣營。另一成員黃定光亦指煲底屬半室內範圍，搭建舞台始終有一定危險性，又話行出兩步嘅立法會廣場可以搭建符合規格嘅舞台，唔擔心新指引係收緊示威自由。