中環出更：新增職位「耍議員」各界圍插徐英偉
立法會人事編制小組委員會尋日開會討論喺勞工處開設一個首席勞工事務主任職位，處理取消強積金對沖制度相關嘅工作，唔少議員批評政府是次要求開設常額職位而非編外職位，認為未有清楚列明工作範圍，其中紡織及製衣界議員鍾國斌批評勞工及福利局副局長徐英偉耍議員、態度「Hea」，要求徐「正正常常」回應議員提問，更揚言「我一條友可以拖你六個鐘，唔使旨意今年開到呢個位」。
處理撤對沖 工作範圍過闊
鍾國斌話根據現時政府嘅講法，呢個職位嘅工作範圍「闊到不得了」，所有工作都係由呢個職位去處理，又話「唔相信有一個人咁有超能力可以做咁多嘢」。佢又話即使開設編外職位，政府亦可提出延續性，建議政府應先開設編外職位，留待立法過咗之後先轉回常額職位。勞工界議員潘兆平亦指當局仲未打算就標準工時立法，點解唔重新調配工作，將處理標準工時嘅人員兼顧處理強積金對沖。
徐英偉回應時話取消強積金對沖係富有爭議性嘅議題，而有商界仍反對方案，因此有需要新增職位與商界溝通。佢又話政府雖對落實標準工時立法有保留，但仍處理相關研究工作，而且取消強積金對沖嘅工作量非常大，所以有需要開設新職位。最後會議討論咗兩小時仍未進行投票。
卓妮