港產官僚不嬲講就天下無敵，做就無能為力，好似六年前提出嘅「人人暢道通行」計劃吖，拖到今時今日，完成率竟然不足四成，港府辦事效率慢過烏龜，旨意呢班廢官利民紓困喎，市民等到變長頸鹿都未等到喇。
呢，立法會交通事務委員會尋日就狂炳「人人暢道通行」計劃進度慢吞吞，由二○一二年提出到家陣，竟然仲有逾六成項目未完成，有啲甚至仲喺勘測或者設計階段，即係咩意思？即係十畫未有一撇囉，即係市民急官老爺唔急囉。難為路政署仲死撐，將隻鑊卸得就卸，一時賴需時勘測，一時又賴要去區議會諮詢，仲話要刊憲、招標，程序多多，辦事效率已經算快喎。乜嘢係人無恥便無敵？呢個政府就係人辦喇。
官老爺究竟知唔知個醜字點寫o架？家陣只係為全港二百多個符合條件嘅行人天橋、高架行人路同行人隧道加建無障礙設施啫，簡單啲講，即係加建升降機咁大把，又唔係移山填海咁大陣仗，咁嘅蚊型地區工程都要蹉跎六年，有冇再離譜啲呀？枉林鄭仲話政府管治新風格以行動做主導，唔會議而不決、決而不行，證明又一次呃鬼食豆腐。
講真吖，路政署冇心冇肺，對於關乎市民福祉嘅工作拖得就拖，「人人暢道通行」計劃幾時至會全數完成，冇人答得出實際日期，官老爺只係拍晒心口，猛話有足夠人手應付喎。弊在超強颱風山竹襲港期間，計劃入面十六部升降機吹到跪低，到依家都未修理好，維修工作拖足兩個月都搞唔掂，何況係加建工程？所以話，「港官靠得住，豬乸會上樹」，真係一啲都冇講錯（口架）。
話時話，香港人口老化，高齡海嘯殺到埋身，幫助市民出行嘅無障礙設施需求愈來愈大，偏偏港府頭大無腦，腦大裝草，淨係安排路政署主理「人人暢道通行」計劃，房署同領展轄下公共屋邨無法受惠，搞到唔少住喺公屋或舊區嘅公公婆婆出入要行長命樓梯，怨聲載道。譬如沙田新田圍邨嘅「長命天梯」就係典型例子，對於後生仔嚟講，行七十幾級樓梯都唔易捱，何況係長者？呢個政府到底係敬老定係虐老，大家心照喇。
講到尾，港府最叻大隻講，開口埋口與民同行，其實講一套，做一套，一啲同理心都冇，對賣紙皮阿婆固然又拉又鎖，為咗興建公務員學院，仲醜到向弱能殘疾人士落手，搶走觀塘特殊教育職訓中心塊靚地。咁涼薄嘅政府，擺明歧視老弱傷殘兼違反施政承諾，貨不對辦，唔該平機會同海關快啲做嘢吖！