政情：何君堯搬元朗泊車慳唔少

何話，佢幾年前住喺薄扶林，每個車位月租四千八百元，依家仲升咗約三成，睇怕隨時都要七千元喇。佢又話，因為一向都有喺屯門做地區工作，之前就搬咗去近啲嘅元朗，依家住喺元朗獨立屋，就唔使再租車位，佢仲由以前得兩三部車，變成有四部車。

多12分鐘就返到立會

何作為立法會議員，經常要返位於金鐘嘅立法會開會。一講到由元朗去中西區，相信好多人都擔心交通問題。何就話其實揸車都只係三十分鐘，加上佢有請司機，唔使自己揸。而過往薄扶林去中西區，行車緩慢嘅話都要十八分鐘，認為多十二分鐘，但就慳咁多租泊車位錢，真係好抵咁話。