中環出更：街工財困炒人 遣散天晴團隊
街坊工友服務處（街工）早前解僱「勞工組」引起軒然大波，其後更爆發退會潮，事件糾纏咗幾個月先至落幕。
相隔唔夠半年，街工又再請食「炒魷」，今次輪到佢哋天水圍嘅天晴團隊，涉及三名組織幹事，佢哋都話對突然被遣散感到錯愕同憤慨。今次身為街工執委嘅立法會議員梁耀忠（阿忠）又點解釋呢？
梁耀忠指部分同事不體諒
街工天水圍天晴團隊組織幹事郭文浩尋日喺社交網站發貼，話佢今個月初收到街工執委通知，會方因財困而需放棄天晴邨嘅地區工作，並會遣散佢、梁彩琴同林子晴三位天晴團隊嘅組織幹事。喺本周三（14日）雙方已正式會面，並告知下星期二（20日）係佢哋嘅最後工作天。
郭又提到，佢哋三人分別服務天水圍半年至近九年不等，住港島嘅佢更係日日都一早入天水圍返工。佢哋都對會方突然遣散嘅決定感到錯愕同憤慨咁話。
不過有街工中人就反駁其實一早於九月已經通知天晴團隊遣散事宜，但係亦都承認街工面臨嚴重嘅財赤，籌唔到錢之餘，部分中心更被加租兩成。
阿忠接受查詢時就呻話部分同事無視財赤困局係未有體諒會方，又聲稱並非為日後選舉而「收埋啲錢」，他重申作出遣散的決定都係無可奈何喎。
卓妮